Ameisen bi’n Ogenarzt

Grauer Vagel

As en vernünftige un gesundheitsbewusste Deern geiht man jo halfjaarlig to’n Ogentüv. Man weet ja nich, of de graue Vagel – ok „Star“ nöömt – al heimlich rinflogen is un sik in de Lins’ en lütt Weekenendhüüschen baut hett. De Piepmatz singt nich, he twitschert nich – he sitt stumm in de Lins’ un maakt dat Leven so milchig as en slecht afspült Marmeladenglas.

Augendoktor

Man to. Termin maakt. Gung fix. Moderne ollere Lüüd maakt dat hüt allens online, wiel de Tasten op’n Sabbelkasten so lütt sünd, dat man se bloots mit Glück, Spucke un en lütt Bittgebet trefft. Aver siehe dor: prompt en Termin. Rin in de Praxis, Kaart dörtrecken, an’t Wartezimmer vörbi un glieks to’n Doktor. So dringlich weer dat bi mi nich. Veellicht ehr bi em – he kann de vele Patienten wull sülvst nich mehr sehn.

„Ogendruck heel good“, seggt he. Ik nick, as hätt ik dat sülvst mit’n Drehmomentschlüssel fastdreiht.

Denn keem dat berühmt Ogen‑Akrobatikprogramm mit Bookstaben un Tallensalat op fief Meter Afstand. De grooten Lettern – teihn Zentimeter hoog – heff ik locker erkannt.

A, P, R, S… 5, 9, 8, 3. Ik weer kurz vörbi, „Bingo!“ to ropen.

Ameisen

Aver de Doktor harr wohl en schlechten Dag un drückte genervt op’n Ameisenknopp. Mikrobookstaben, de över de witte Tafel wimmeln as en Ameisenhopen in’n Hochsomer. Dor weer Schluss mit Lenchens Sehfähigkeit.

Sehschwäche? Ach wat. Ik pflege siet Kinnerbeenen dat Mullworp‑Syndroom un dreeg de Erfindung vun de Optik in all Lebenslagen.

Reaktion op hell un dunkel? He fragt, ik antwoord: „Hell is, wenn de Sünn upgeiht. Dunkel is, wenn de Maand schient.“ So eenfach kann Medizin sien.

Un de graue Vagel? He hett sik bloots lütt in’n Nest sett. En beten Flaum, mehr nich. Ik heff noch Johren Tied, ehr de Messer blitzen un de Linsenbauer för’t Oog kummt. He suggt den ollen Nebel rut un sett en niege Scheev in – as bi Lenchen bi’t Finsternputzen, bloots mit mehr Hygiene.

Bis dorhen geiht Lenchen wieter brav to’n Ogentüv. Man will ja nich, dat de Ameisen am Enn dat ganze Oog övernehmen.